بشير عثمان بشير يكتب… الــ50 بإحساس 30 !!

كنا زمان (يعني ما زمان شديد ) لما كنا في عمر ١٨ او ٢٠ كده لما تجي سيرت واحد قدامنا ويقولو ده عمرو ٥٠ سنة كنا بنشوف انو ده جدو عديييل وزول كبير شديد وشايب وتفكيرو ما عندو علاقة باي حاجة عندها علاقة بالشباب ….لكن سبحان الله ما بتعرف الحاجة الا تعيشها بنفسك ….

اول شي اكتشفنا انو ٩٠ في المية من تفكيرك وتصرفاتك ما بتختلف كتير عن واحد عمرو ٣٠ سنة في حاجات كتيرة جدا …..

اكتشفنا انو ٥٠ دي هي لسه عز الشباب ….طبعا اكيييد بكون في تفكير اكثر نضج وحكمة كده بتكون نزلت عليك من السما ….لكن حاجات كتيرة بتكون ذي ما هي وانت عمرك ٣٠ ما اتغير فيها شي ….

لما تقعد مع زول ال٣٠ بتكون حاسي انو قدرك وعندو نفس أفكارك لكن زول ال٣٠ بكون شاعر بأنك عجوز وبكون عامل مسافة بيناتكم معذور لانو بكون عندو فهمنا داااااك بتاع ال٢٠ ….

نصيحتي لناس ال٢٠ وال٣٠ استفيدو من زول ال٥٠ تابعو اي شي بقولو اسالو من رايو في مواضيع محيراكم وركزو مع كلامو شديد حيديكم خبرات متراكمة لو انت ذكي ممكن تستفيد منها كتير والعاقل من اتعظ بغيره …..

احساس زول ال٥٠ ببعض الأشياء ممكن يحصل فيهو تغيير لكترت مرورها عليه ….

ذي الأعياد والمناسبات السنوية مثلا متعتها عندو بتقل شوية والسبب لانو مرت عليهو كتيييير اكتر منك انت زول ال٢٠ او ال٣٠ يعني هو حضر كم عيد ضحية مثلا حضر كم رمضان …..

في حاجات ببدا شغفو بيها يقل وممكن تبدأ تظهر اهتمامات تاني جديدة بس ذي ما قلنا الحاجة دي ممكن تكون محصورة في ١٠ في المية بس الباقي كلو ذي زول ال٣٠ …..

اها عايزين زول ال٦٠ يجي يدينا احساسو عشان نكون عارفين قبل وقت كافي ….ربنا يمد في الاعمار بالعمل الصالح.

**مهندس زراعي 
ايميل diab777@yahoo.com